)عناية وتصفيف الشعر الناعم (الدهني

بسم الله الرحمن الرحيم
السلام عليكم ورحمه الله وبركاته
حياكم الله في مدونتي

لاحظت اهتمام كبير منكم على مواضيع العناية بالبشرة والشعر ولان عندي تجارب طويله بالشعر حبيت اشارككم اياها
بدايةً خلينا نتكلم شوي عن الشعر الناعم
مؤكد لكل نوع من الشعر جماله وخصوصيتة ومميزاتة وعيوبة
ولكل نوع عناية خاصة مختلفة عن غيره
انا بتكلم عن الشعر الناعم
الشعر الناعم دائما حلم كل بنت صغيرة ومضرب للمثل وأسلوب دعائي في كل ماركات المختصة بالعناية بالشعر
ودائماً كنا نشوف الشعر الحريري اللي ينلف على عارضة الاعلان والملمس الحريري الخيالي

بداية بتكلم عن المميزات قبل العيوب
إذا كنت من صاحبات الشعر الناعم الحريري فأنتِ في نعمة عظيمة
وهذا لا يقلل من جمال اي نوع ثاني إنما هو شكر وامتنان لنعمة لديك
ميزة الشعر الناعم انك دايماً جاهزه تطلعين ماتضطرين تصلحينه ودائماً شكله انثوي ومرتب
وبأقل الجهد تطلعين بنتائج رائعه

بمعنى اذا تبينه ستريت بسرعة تسوينه واذا تبينه ويفي بسرعة تسوينه
بعكس الشعر الاجعد أو الكيرلي يحتاج استشوار قبل لا ينلف عشان يطلع حلو
اذا شعرك ناعم سوية بالفير ومشطيه بالفرشه وبتطلع النتيجة خيال

احياناً اضيف سيرم خفيف جداً للأطراف إذا كانت ناشفة ومقصفه عشان تعطيني لمعة وتطلع
بهذا الشكل زي الصورة بس شي بسيط جداً جربوها بيوم مايكون عندكم مناسبة
—————————–

واذا تبين تسوينه ويفي برضو شهر بنفس الفير لكن تنحفين الخصل وتلفينها بطريقه بعيده عن بعض وبدون ماتوصلين للأطراف
وتطلع نتيجة رائعة وممكن تضيفين الرغوة على شعرك عشان تعطيك كثافة قبل لا تلفين شعرك

بنات تصليح الشعر شي مرة سهل وممتع واتقنته بعمر مبكر بسبب اني كنت اخذ وقت عشان اتدرب حتى لو ماعندي مناسبة اجرب كثير لين تعودت يدي على الفير وجربت اكثر من شكل وطريقة وتابعت باليوتيوب وايام كنت احط مرايه وراء ظهري عشان اشوف واسوي تسريحات كاملة بالبداية تحسين بصعوبة لين تتعودين
و تتمكنين
اذكر كان عندي كل انواع واحجام الفير و اوصي عليه من شرق وغرب العالم
لين عرفت ان مهارة اليد اهم وفير واحد متوسط الحجم وجودة جيدة يكفيك
التدريب اهم وانصحكم تتدربون قبل المناسبه بيوم بحيث مايكون عندك ضغط نفسي ومتوترة على الوقت ومو متأكدة لو راح تضبطينه او لا
التدريب قبل بيوم يعطيك ثقة ومعرفة للخطوات واختصار
هذا فقط بالبداية بعد كذا يصير الموضوع بسيط وسهل وفطري
———————————-
ايضاً من الحلول السهله السريعة
ترفعين شعرك اذا ماعندك وقت تصلحينه

او اضافة اكسسوار مثل الوشاح الحريري ولو كان قطني أفضل يمسك اكثر او الأطواق

الان بتكلم عن عيوب الشعر الناعم وطريقة لحل هذه المشاكل
الشعر الناعم غالباً دهني ويفقد حجمه بسرعه وسهولة
سابقاً شعري كان جداً جداً أشبه بشعور الاسيويات ناعم لا يمسك فيه لا فير ولا بخاخ مثبت ولا شي بنص اليوم القاة تفكك ورجع لطبيعته
الحل الأول اللي يبدو غريب شوي هو الصبغه
الصبغة اعطتني توازن نشفت شعري شوي صار يمسك اللفه ويضبط معاي كل شي وصار فيه حجم شوي
ف الي ماقد صبغت شعرها وتعاني من النعومة الزائدة تجرب تصبغ عند مختص صبغه خفيفة على الشعر
كون أن الشعر الدهني صحي جداً اذا نشف شوي مافي مشكلة ولاراح يبان عليه بالعكس يتوازن
واللي معتمدة الحنا وما تبي تصبغ تجرب السدر السدر ممتاز جداً للشعر
ذُكِر في السنة للتساقط والكثافة ولمعة الشعر لكن انتبهوا اللي صابغين ممكن يقلب لون الصبغه شوي
انا كنت اخلطه مع الشامبو حقي كل يوم بيومه عشان مايخرب جوا علبه الشامبو وقت طويل
مره ينشف الشعر وهذا المطلوب لأصحاب الشعر الدهني
لكن احرصوا على ترطيب الاطراف بشكل دائم
دام شعرك دهني هذا يعني انك مجبورة تغسلينه بشكل دائم لذلك لاتتكيسلين انك تزيتين شعرك قبل الشور
لو حتى ١٠ دقايق يفرق كثير مع الوقت بالترطيب واللمعه كون اننا نستخدم الحرارة والمستحضرات على الشعر دايماً
لكن جربي اي زيت مناسب لك ولا تحرصين على الجذور خلك بالأطراف
ابحثوا عن الموضوع وجربوا بنفسكم

طيب مشكله الحجم قلنا اول شي الصبغه والسدر
ثاني شي حل قديم بدآ من عصور قديمة ولا زال

تقنية لازالت معاصرة لقوة تأثيرها

لفافات الشعر
ما ابالغ لو اقولكم مافي شي يعطي الشعر حجم زي اللفافات
جربي بس حطيها على مقدمة الراس من فوق
عرضي شعرك للحرارة بالاستشوار بعدين حطي ٣ او ٤ لفافات كبيرة الحجم وخليها لين تخلصين مكياج ولبسك وفكيها وشوفي كيف يصير
ابحثي باليوتيوب مليان مقاطع تشرح طريقتها

الحل الثالث هو الشامبو الجاف
DRY SHAMPOO
فكرتة هو بودرة توضع بجذور الشعر ويتم تمشيطه تجفف المنطقه وتعطي حجم كبير
رائعه للمناسبات لكن شعرك ماراح يتحرك براحته بيصير واقف شوف بس شكله حلو
الي شعرها دهني ومايكمل ٢٤ ساعه ويدهن بيفك لها ازمه
بس قبل لايدهن شعرك ويصير مظهره دهني استخدمية
ما انصح ابداََ يستخدم على شعر دهني غير نظيف
عيبه انه بودرة تحسين شعرك مو نظيف زي شعور السبرية واذا مسكتي شعرك تحسين تحت اظافرك غبار لانه بودرة
رغم عيوبه الا انه شي رهيب وكل بنت شعرها ناعم ودهني لازم يكون عندها
جربت انواع كثير في انواع فيها لون نفس لون الشعر حلو اذا جذورك طالعه يطفيها شوي
تلقونها اون لاين او في صيدليات كبيرة زي بوتس و وايتس

ايضاََ من الأشياء المهمة هو قصة الشعر التدريج للشعر يعطي كثافة وحجم أكثر للشعر الناعم
مهم تلقون شخص يعرف يقص لكم شعركم حلو بحيث التدريج يكون بالشكل الصحيح الي يعطي الكثافة مو الشكل الي يبين كان الشعر خفيف

—————————————————————
هذا كل الي عندي اليوم موضوعنا اتمنى ما اكون طولت عليكم وانوي لكم المتعة والاستفادة
اذا اعجبكم الموضوع واحببتم المزيد شاركوا الموضوع عن طريق اي وسيلة تواصل تناسبكم واكتبوا لي تعليقاتكم وارائكم ومعلومة استفدوا منها تحت هذا الموضوع

شكراً لكم نراكم على خير

نُشر بواسطة BSHAYER ALQUNAIBET

انا بشاير القنيبط مصممة أزياء واشارككم كل ما اعرف عن الفاشن خط الأزياء الخاص بي على انستقرام @BSHAYERALQUNAIBET

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.

%d مدونون معجبون بهذه: